防火冷知識 - 何為合規格嘅防火門

隨著呢幾年防火安全意識嘅增強，唔少客人過來揀大門同廚房門嘅時候，除佐外型同款式，都會考慮埋佢地嘅防火性能。既然大家對防火門充滿迷思，今日我地就一一解答返點為之一度合規格既防火門。

1.最少一個鐘嘅防火時效
防火門其中一個重要嘅因素就係完整性(Integrity)，簡單來講就係佢俾猛火燒嘅時候，可以係指定時間內唔會發生變形，阻隔火勢蔓延去門既另一邊，為逃生和消防員救援爭取時間。市面上嘅防火門耐火時效由半小時到四小時不等。通常來講，家居大門同廚房門都需要一小時既防火時效。

2.良好既隔熱性能
另一個防火門要具備既因素就係隔熱性 (Insulation)，姐係要有效咁減少傳熱。在指定時間內要滿足兩個要求：1) 非受火面既最高溫度唔可以超過室溫加180度；2）非受火面既平均溫度唔可以超過室溫加140度。

3.高品質防火防煙條
通常而言，門框(Door Frame) 或門扇(Door Leaf) 既邊位會鑲嵌防火條。當遇上猛火燃燒時，防火條(Fire Seal) 會遇熱膨脹，填封門扇同門框之間既縫隙。而歐盟標準(BS EN)防火門更會有埋防煙功能。佢底部既防煙閘同防煙條(Smoke Seal) 可以形成有效保護層，阻隔濃煙穿透。

4.防火芯料
同普通木門相比，防火門門芯都會有木質骨架，但入面用佐防火物料做填充物。常見的門芯物料有珍珠岩，隔熱棉。兩邊表層木皮下面更會加多1至2層約5.5mm厚既防火板(Fire-rated Board)，所以防火門較一般實心門，空心門更加扎實同穩固。

5.識得自動關門
一般來講，防火門門頂都會裝上一個「關門器」(Door Closer)。在任何時候防火門都能自動關閉，係防火安全既概念上尤為重要。「關門器」有分明氣鼓同暗氣鼓呢兩種，暗氣鼓既價錢相對貴一啲，但因為可以藏係門⾝入面，所以適合對美觀有要求既客人。